Яшчэ адзін папулярны гродзенскі партал прызналі «экстрэмісцкім»

Сайт і сацсеткі Grodno.in прызналі «экстрэмісцкімі матэрыяламі». Так вырашыў суд Ленінскага раёна Гродна 20 снежня 2024 года. Экстрэмісцкай стала і сама назва сайта Grodno.in, заўважыў Hrodna.life.

Скрыншот: БАЖ

Акрамя сайта, «экстрэмісцкімі» прызналі два звязаных з парталам тэлеграм-каналы, старонкі ў Tik­Tok, Insta­gram, Face­book, X, «УКантакце» і «Аднакласніках», а таксама лагатып і саму назву «Grodno.in».

На раніцу 24 снежня 2024 года сайт перстаў адкрывацца.

Партал Grodno.in працуе з 2013 года. Ён уключае некалькі сэрвісаў: каталог, навіны, пошук вакансій. Праект працаваў з рэкламай.

У красавіку 2024 года ўладальнікі партала судзіліся з праўладнай актывісткай Вольгай Бондаравай. Справа тычылася паста Бондаравай у «Тэлеграме», дзе яна называла сайт Grodno.in экстрэмісцкім.

Нагадаем, у кастрычніку 2024 года самы папулярны гродзенскі інфармацыйны партал s13.ru таксама быў прызнаны «экстрэмісцімі матэрыяламі», а пазней — «экстрэмісцкім фарміраваннем».

«Увесь горад на вушах». Што адбываецца ў Гродне пасля прызнання папулярнага гарадскога сайта «экстрэмісцкім»

Таксама «экстрэмісцкай» прызналі старонку ў «Фэйсбуку» галоўнай рэдактаркі тэлеканала «Белсат» Аліны Коўшык.

Заяву супраць Grodno.in і Аліны Коўшык падаў пракурор горада Гродна, паведаміла Генеральная пракуратура Беларусі.