Італія дамагаецца вызвалення журналісткі Чэчыліі Сала, арыштаванай у Іране

Чэчылія Сала — рэпарцёрка газеты Il Foglio і вядоўца падкаста Sto­ries от Cho­ra Media. Тэгеран, які часта абвінавачваюць у правядзенні «дыпламатыі закладнікаў», пакуль афіцыйна не каментаваў арышт італьянскай журналісткі.

Чэчылія Сала. Фота: GIO_LE/Shutterstock.com

Журналістка вылецела з Hыма 12 снежня, маючы на руках журналісцкую візу і афіцыйныя гарантыі для замежных карэспандэнтаў, паведамляе Euronews са спасылкай на Cho­ra Media.

За час свайго знаходжання ў Іране яна зрабіла некалькі інтэрв’ю і выпусціла тры часткі падкаста.

Журналістка планавала вярнуцца дахаты 20 снежня, аднак днём раней яна перастала выходзіць на сувязь. Па звестках Il Foglio, зараз яе трымаюць у турме для дысідэнтаў Эвін.

Фота: AP

Міністр замежных спраў Італіі Антоніа Таяні заявіў, што Чэчылія Сала «знаходзіцца ў добрым стане» і вядуцца перамовы па яе вызваленні. Журналістку наведаў амбасадар Італіі ў Іране, і ёй далі пагаварыць з бацькамі.

На адрас Ірана раздаюцца абвінавачанні ў тым, што ён практыкуе «дыпламатыю закладнікаў»: затрымлівае замежных грамадзян, каб з іх дапамагой дабівацца ўласных мэтаў. Цяпер Тэгеран спрабуе вызваліць Махамеда Абедзіні, затрыманага ў аэрапорце Мілана за мяркуемы ўдзел у атацы дронаў па Іарданіі начапатку гэтага года, у выніку якога загінулі амерыканскія вайскоўцы.

Cecil­ia Sala sta bene.

Il Gov­er­no lavo­ra con dis­crezione per ripor­tar­la presto a casa. pic.twitter.com/LRf7cpI7jk

— Anto­nio Tajani (@Antonio_Tajani) Decem­ber 28, 2024

Іран практыкуе выкарыстанне зняволеных у якасці разменнай манеты на перамовах з часоў крызісу ў амбасадзе ЗША ў 1979 годзе. Тады дзясяткі закладнікаў былі вызваленыя пасля 444 дзён палону.

Адзін з апошніх гучных фактаў датаваны вераснем 2023 годам, калі пяцёра амерыканцаў, якіх некалькі гадоў утрымліваў Іран, былі вызваленыя ў абмен на пяцярых іранцаў, што сядзелі ў турмах ЗША, і 6 мільярдаў долараў замарожаных іранскіх актываў, якія мусіла вярнуць Паўднёвая Карэя.