Сёмая Школа талерантнасці для беларускіх журналістаў (да 1 траўня)

Абвяшчаецца конкурс на ўдзел у Сёмай Школе талерантнасці для беларускіх журналістаў “ Ад мовы варожасці ў СМІ да злачынстваў на глебе нянавісці. Філасофскія асновы “забойства словам”

Сёмая Школа талерантнасці для журналістаў арганізоўваецца і каардынуецца ініцыятывай “Журналісты за талерантнасць” і будзе праходзіць з 24 па 27 траўня 2018 года ў Нідзе, Літва. (Ад’езд з Менску 24 траўня ў вечары).

Падчас навучання ўдзельнікі паглыбяць свае веды аб стандартах правоў чалавека, атрымаюць веды адносна талерантнасці, уплыву стэрэатыпаў у нашым жыцці, разумення тэрміну “мова варожасці”, стану ўразлівых групаў у нашым грамадстве, навучацца бачыць праявы стыгматызацыі, дыскрымінацыі і неталерантнасці, а таксама даведаюцца, як пазбягаць іх у прафесійнай журналісцкай дзейнасці.

 Мэтавая група:

Да ўдзелу ў праграме запрашаюцца журналісты (штатныя і фрылансеры) розных сродкаў масавай інфармацыі і блогеры, зацікаўленыя ў паглыбленні ведаў у галіне правоў чалавека і ў тэматыцы, звязанай з талерантнасцю і недыскрымінацыяй.

Прэтэндэнты на ўдзел у Сёмай Школе талерантнасці для беларускіх журналістаў павінны адпавядаць наступным крытэрам:

• Актыўна цікавіцца праблематыкай, звязанай з правамі чалавека і дыскрымінацыяй уразлівых сацыяльных групаў;
• Мець пэўны досвед працы ў галіне журналістыкі;
• Быць гатовымі працаваць у камандзе з іншымі ўдзельнікамі Школы;
• Абавязкова ўдзельнічаць ва ўсіх мерапрыемствах на працягу Школы талерантнасці;
• Мець дзейсную візу Шэнген на дні правядзення школы;
• Быць гатовымі актыўна супрацоўнічаць пасля навучальнай дзейнасці з арганізатарамі Школы і выкарыстоўваць набытыя веды і навыкі ў прафесійнай журналісцкай дзейнасці;

Арганізатары пакідаюць за сабой права выключыць удзельніка ў выпадку невыканання ўмоваў удзелу ў Школе.

Падача заявак на ўдзел:

Удзельнікі Сёмай Школы талерантнасці для журналістаў будуць адабраныя на конкурснай аснове арганізатарамі Школы.

Для ўдзелу ў конкурсе прэтэндэнты мусяць даслаць да 1 траўня 2018 года ўключна заяўку на ўдзел, якая мае ўключаць у сябе кароткае CV і матывацыйны ліст па электронным адрасе: info@j4t.by.

Наяўнасць рэкамендацыйных лістоў вітаецца і абавязкова будзе ўлічана падчас правядзення конкурса.

Арганізатары забяспечваюць харчаванне і пражыванне ўдзельнікаў Сёмай Школы талерантнасці для журналістаў, выдаткі на праезд да месца правядзення заняткаў і назад.