Кожны знойдзе свае прычыны — Onliner пра тое, што адбываецца з парталам

Яшчэ ў мінулым годзе Onlin­er быў адным з самых яркіх медыя, якія асвятлялі ўсе актуальныя падзеі ў краіне. Партал пісаў і пра выбары, і пра паслявыбарчыя пратэсты. Аднак на фоне рэпрэсій, якія ўлада пачала ў дачыненні да незалежных СМІ, сайт перастаў публікаваць артыкулы і навіны на значныя палітычныя і сацыяльныя тэмы.

«У апошнія месяцы многія з вас маглі заўважыць перамены ў навінавай павестцы Onlin­er . Сёння мы сфармулюем асноўныя змены, каб дыстанцыя паміж намі заставалася мінімальнай», — гаворыцца ў рэдакцыйным артыкуле, апублікаваным у сераду на партале.

Змяняецца раздзел «Людзі», які, на думку самой рэдакцыі, у апошнія гады стаў «нашым галоўным навінавым адлюстраваннем грамадскага жыцця». Але ў тым выглядзе, у якім ён існуе цяпер, гэты раздзел «перастаў выконваць свае асноўныя функцыі. Кожны знойдзе ў гэтым свае прычыны і падставы».

Раздзел «Людзі» больш не будзе займацца навінамі, а будзе публікаваць гісторыі пра пенсіянераў, людзей з інваліднасцю і шматдзетныя сем’і.

З’явіцца раздзел «Лайфстайл». Ён будзе прысвечаны тэмам здароўя, псіхалогіі, адносін, культуры і моды — усяму таму, што, на думку рэдакцыі, «фармуе актуальныя межы жыцця чалавека кожны дзень».

Пасля выбараў мінулай восенню з рэдакцыі Onlín­er сышло адразу некалькі журналістаў, у тым ліку галоўны рэдактар Мікалай Казловіч.