Літоўская прэмія «Надзея Свабоды» прысуджана журналісту Андрэю Аляксандраву

Кандыдатуру Андрэя Аляксандрава прапанавалі беларускія журналісцкія арганізацыі. Андрэй у 2009–2012 гадах быў намеснікам старшыні Беларускай асацыяцыі журналістаў, у 2014–2018 гадах працаваў намеснікам дырэктара незалежнага беларускага інфармацыйнага агенцтва БелаПАН, працаваў у міжнародных арганізацыях Index on Cen­sor­ship і Arti­cle 19, стварыў і рэдагаваў перыядычнае выданне «Беларускі журнал». 

12 студзеня 2021 года ён быў затрыманы і да гэтага часу знаходзіцца ў следчым ізалятары.

«Журналісцкая супольнасць Літвы з заклапочанасцю назірае, як рэпрэсіямі спрабуюць патапіць свабодныя СМІ ў Беларусі. Журналістаў садзяць у турмы, і літоўскія журналісты адчуваюць іх боль. Таму, салідарызуючыся са зняволенымі ў турмах Беларусі журналістамі, журналісцкая супольнасць Літвы вырашыла заснаваць для іх прэмію», — адзначыў старшыня Літоўскага саюза журналістаў Дайнюс Радзявічус.

Уручэнне прэміі было прымеркавана да Міжнароднага дня правоў чалавека.

Журналістка Таццяна Каравенкова атрымала гэтую прэмію за мінулы год. У 2020 годзе прэмія “Надзея Свабоды” была прысуджана беларускім журналісткам Кацярыне Барысевіч, Алене Талкачовай, Таццяне Каравенковай, Кацярыне Андрэевай і Дар’і Чульцовай.

Цяпер Талкачова, Чульцова и Андрэева знаходзяцца за ркатами.

«Для мяне вялікі гонар атрымаць гэтую прэмію, у тым ліку і за маіх калег. Трое з якіх зараз знаходзяцца за кратамі. Дзякуй вялікі за падтрымку», — сказала Таццяна Каравенкова.

Прэмія «Надзея Свабоды» для беларускіх журналістаў  заснавана Саюазам журналістаў Літвы, літоўскай журналісцкай супольнасцю і сям’ёй парламентарыя Казіса Старкявічуса.