Магілёўскі журналіст дамогся аднаўлення праверкі па крымінальнай справе за пабоі

Пастанова Мядзведзевай адмененая 20 лістапада пасля звароту журналіста ў пракуратуру Магілёва. Пра гэта паведамляецца ў афіцыйным лісце за подпісам в. а. пракурора Магілёва саветніка юстыцыі Аляксандра Карэнькова.

“Устаноўлена, што праверка па матэрыялах праведзена няпоўна. Не высветленыя ўсе абставіны здарэння, у сувязі з чым працэсуальнае рашэнне вынесенае дачасна”, — напісаў пракурор журналісту.

Далей паведамляецца, што матэрыялы праверкі следчай Мядзведзевай накіраваныя ў Магілёўскі міжрайаддзел СК для правядзення дадатковай праверкі ў адпаведнасці з пісьмовымі ўказаннямі пракуратуры Магілёва.

Нагадаем, што Уладзіміра Лапцэвіча затрымалі 5 жніўня ў будынку Ленінскага РАУС Магілёва, куды ён прыйшоў, каб высветліць лёс яшчэ аднаго затрыманага магілёўскага журналіста — Аляксандра Буракова (старэйшага).

У Ленінскім РАУС праваахоўнікі надзелі на журналіста кайданкі і прымянілі фізічны гвалт: ударылі галавой аб стол і аб падлогу. Таксама міліцыянты пагражалі Лапцэвічу зрабіць яму “ластаўку” (метад фізічнага і псіхалагічнага катавання).

Пазней на журналіста склалі пратакол за непадпарадкаванне патрабаванням супрацоўнікаў міліцыі. 7 жніўня суд Ленінскага раёна Магілёва на падставе гэтага пратакола арыштаваў Уладзіміра Лапцэвіча на 12 сутак паводле арт. 23.4 КаАП.

Уладзімір Лапцэвіч дамагаецца пакарання супрацоўнікаў міліцыі, якія абсалютна неправамерна прымянілі фізічную сілу і нанеслі яму пабоі.

Цялесныя пашкоджанні, нанесеныя журналісту 5 жніўня падчас знаходжання ў Ленінскім РАУС Магілёва, засведчаныя судова-медыцынскай экспертызай.