Магілёўскія БАЖаўцы правялі сход і паразмаўлялі аб праблемах у прафесійнай дзейнасці

Сустрэча ў Магілёве адбылася пасля доўгага перапынку, абумоўленага пандэміяй каранавіруса і поствыбарчай сітуацыяй у краіне, таму тэмаў для абмеркавання хапала. Шэраг сябраў магілёўскай суполкі ГА “БАЖ” патрапілі пад пераслед за сваю журналісцкую дзейнасць, многім давялося пабываць пад арыштам і выплаціць вялізныя штрафы.

Старшыня суполкі Барыс Вырвіч распавёў бажаўцам, што і зараз прэсінг з боку ўладаў і праваахоўных органаў на сябраў арганізацыі не памяншаецца. Складзены чарговы адміністрацыйны пратакол нібыта за ўдзел у несанкцыянаваных массавых мерапрыемствах на Алеся Сабалеўскага. Позвы ў міліцыю атрымалі галоўны рэдактар інтэрнэт-партала “Магілёўскі рэгіён” Зміцер Салаўёў і яго жонка Надзея. Супрацоўнікі міліцыі прыходзілі дахаты да Аляксандра Буракова і Міхася Аршынскага, але не змаглі застаць іх дома. Пад пагрозай штрафаў паводле арт.22.9 КаАП знаходзяцца фрылансеры Аліна Скрабунова і АлесьСідарэўскі, і г. д.

Магілёўскія бажаўцы выказалі салідарнасць з калегамі, якія знаходзяцца пад ціскам і пераследам. Уладзімір Лапцэвіч паведаміў пра магчымасці псіхалагічнай і іншай дапамогі журналістам, якія патрапілі пад рэпрэсіі і маюць у гэтым неабходнасць.

Свае прапановы пра тое, як арганізаваць дзейнасць суполкі ў няпросты час, выказалі Алесь Буракоў-старэйшы, Зміцер Салаўёў, Пётр Мігурскі і іншыя. Удзельнікі сходу абмеркавалі надзённыя пытанні дзейнасці суполкі, а таксама правялі збор сродкаў для дапамогі пацярпелым ад рэпрэсій магілёўскім актывістам.

Сход адбыўся пры арганізацыйнай падтрымцы рэдакцыі інтэрнэт-партала “Магілёўскі рэгіён”.