БАЖ пачаў маніторынг прарасійскай і антызаходняй прапаганды ў дзяржаўных тэлевізійных СМІ Беларусі
8 студзеня 2025
Асноўная мэта маніторынгу — пацвердзіць ці абвергнуць тэзіс пра тое, што ў перыяд так званых прэзідэнцкіх выбараў-2025 вядучыя дзяржаўныя тэлеканалы Беларусі фарміруюць медыйную карціну пад уплывам ідэй «рускага свету» і інтэграцыйнай і антызаходняй прапаганды.
Фота: БАЖ
Маніторынг праводзіцца ў перыяд так званых прэзідэнцкіх выбараў-2025, аднак не з’яўляецца маніторынгам выбарчай кампаніі, якія раней праводзіў БАЖ. Няма сэнсу вымяраць, колькі часу і плошчы розныя медыі аддаюць палітычным сілам, з улікам жорсткага падаўлення апазіцыі ў краіне і адсутнасці выбару як такога.
Але нас цікавіць, якую палітыку праводзяць у гэты перыяд беларускія дзяржаўныя тэлеканалы і ступень прарасійскай і антызаходняй прапаганды ў іх падчас «гарачага» перыяду выбарчай кампаніі.
Мы праводзілі падобнае даследаванне ў лютым 2024 года (тады яно было прымеркавана да так званых выбараў дэпутатаў Палаты прадстаўнікоў і мясцовых Саветаў), што дазваляе параўнаць вынікі і вызначыць тэндэнцыі ў вяшчанні даследаваных дзяржаўных тэлеканалаў.
Перыяд маніторынгу — з 01.01 па 31.01.2025 года ўключна.
Вызначаюцца:
- Доля тэлепрадукцыі, вырабленай у Расіі або з яе ўдзелам, у вяшчанні тэлеканалаў «Беларусь 1», АНТ, «Сталічнае тэлебачанне» у прайм-тайм.
- Наяўнасць мэсэджаў «рускага свету» і інтэграцыйнай і антызаходняй прапаганды ў перадачах навін беларускіх тэлевізійных дзяржаўных СМІ («Беларусь 1», АНТ, СТБ).
@bajmedia
