«Міліцыянты б’юць журналістаў.mp4». Міліцыянт падае ў суд на Кастуся Жукоўскага
16 снежня 2016
Міліцыянт скіраваў у суд заяву супраць Кастуся Жукоўскага аб абароне гонару, годнасці, дзелавой рэпутацыі і кампенсацыі маральнай шкоды. Апошняя ацэненая ў 2000 рублёў.
Лоеўскі міліцыянт Уладзімір Бухаўцоў падае ў суд Цэнтральнага раёну Гомля іскавую заяву супраць журналіст-фрылансера Кастуся Жукоўскага, аўтара, між іншага, нашага каналу.
Уладзімір Бухаўцоў пакрыўдзіўся на Жукоўскага за размяшчэнне ў інтэрнэце рэпартажу пра дзеянні лоеўскай міліцыі («Лоеў Гестапа») у якім маюцца кадры з удзелам міліцыянта.«У відэазапісе, дзе Жукоўскі задае пытанні жыхарам Лоева, маецца надпіс: «МУС – гестапа. Для мяне, унука пераможцаў фашызму – гэта маральная знявага», – піша міліцыянт.
«З гісторыі нам вядома, што «гестапа – каральны орган фашысцкай Нямеччыны, які закатаваў і забіў сотні тысячаў невінаватых нашых грамадзянаў у гады Вялікай Айчыннай вайны», – нагадвае Бухаўцоў.
Міліцыянт просіць суд прызнаць, што звесткі з відэаматэрыялаў Кастуся Жукоўскага, у тым ліку створаныя для нашага каналу, зневажаюць ягоны гонар, годнасць і дзелавую рэпутацыю.
Праваахоўнік дамагаецца зняпраўджвання Кастусём Жукоўскім гэтай інфармацыі ў друкаваных медыях і спагнання з журналіста грашовай кампенсацыі маральнай школы ў памеры Br 2000.
@bajmedia
