МУС прызнаў «экстрэмісцкім фарміраваннем» медыяпраект «Позірк»

19 снежня ў пералік «экстрэмісцкіх фарміраванняў» на сайце Міністэрства ўнутраных спраў Беларусі дадалі медыяпраект «Позірк» — уласна інтэрнэт-партал і афіляваныя з ім акаўнты ў сацыяльных сетках і мэсанджарах.

Скрыншот сайта медыяпраекта «Позірк»

Паводле звестак у «экстрэмісцкім» пераліку на сайце МУС, рашэнне «Аб прызнанні групы грамадзян экстрэмісцкім фарміраваннем і забароне ягонай дзейнасці» было прынятае ведамствам 19 снежня і ў гэты ж дзень уступіла ў законную сілу.

У гэтым рашэнні згаданыя наступныя інтэрнэт-рэсурсы, праз якія нібыта здзяйснялася «экстрэмісцкая дзейнасць»:

• інтэрнэт-партал  «Позірк» з ідэнтыфікатарамі https://pozirk.online або https://bpn-info.online;
• старонка у Face­book з назвай «Pozirk — Навіны пра Беларусь»;
• старонка ў X з назвай «Pozirk»;
•  YouTube-канал з назвай  «Позірк»;
• тele­gram-канал з назвай «Pozirk. Навіны пра Беларусь»;
• Tik­Tok-канал з назвай «pozirk_online»;
• старонка ў Insta­gram з назвай «pozirk_online»;
• акаўнт на  Spo­ti­fy з назвай  «Позірк. Размовы пра Беларусь»;
•  электронная пошта pozirk@pozirk.online.

У якасці групы грамадзян, якія здзяйснялі «экстрэмісцкую дзейнасць» на згаданых рэсурсах, МУС  пералічыў журналістаў Таццяну Каравянкову, Аляксандра Класкоўскага, юрыста Рамана Кісляка, аналітыкаў Пятра Рудкоўскага і Аляксандра Фрыдмана. 

Таксама ў персанальным пераліку «экстрэмістаў» згадваецца  «Агенцыя навінаў» (пад ранейшай назвай   «Naviny.by» як  складнік экстрэмісцкага фарміравання «Информационное агентство ЗАО «БелаПАН», якому быў нададзены «экстрэмісцкі» статус паводле рашэння КДБ ад 1 лістапада 2021 года).

«Экстрэмісцкім» прызнаны і лагатып медыяпраекта — «у выглядзе фона чырвонага колеру, у цэнтры якога — мастацкая выява чалавечага вока з упісанай літарай «П» белага колера ўнутры чорнага круга».