МЗС правяло брыфінг з удзелам Рамана Пратасевіча. Ён заявіў, што нікому не здраджвае, а «проста супрацоўнічае са следствам»

Карэспандэнт BBC Джона Фішэр пакінуў брыфінг МЗС у Мінску, куды прывялі Рамана Пратасевіча. «Мы толькі што выйшлі. Не прымаем удзелу, калі ён відавочна знаходзіцца там пад прымусам», — напісаў ён у твітары.
 
У пачатку брыфінга Раман Пратасевіч сказаў, што інфармацыя пра тое, што яго збіваў Аляксандр Лукашэнка, — жарт.

Крывападцёкі на руках, якія былі бачныя на відэа пасля затрымання, — сляды ад сцяжак.

Раман заявіў, што цудоўна пачуваецца, не мае ні на што скаргаў, «ніхто да мяне і пальцам не дакрануўся». Ён заклікаў не ствараць чутак, бо закладнікамі гэтай сітуацыі з’яўляюцца яго бацькі ў Польшчы і Сафія Сапега (знаходзіцца ў СІЗА).

Я бачу, што маіх бацькоў выкарыстоўваюць: яны ездзяць па акцыях пратэсту і г.д. Я перакананы, што яны могуць бяспечна вярнуцца ў Беларусь.

«Мам, пап, не переживаете, у меня все отлично», —  заявіў Пратасевіч.

Пратасевіч заявіў, што ніхто не прымушаў яго да супрацоўніцтва са следствам, да публічных выступаў. Ён сказаў, што разумее, «які ўрон нанёс дзяржаве і краіне  і хоча выправіць гэтую сітуацыю». «Я нікому не здраджваю, нікога не здаю. Я проста супрацоўнічаю са следствам», — заявіў Пратасевіч.

Падчас прэс-канферэнцыі ў МЗС Раман Пратасевіч спытаўся ў прысутных журналістаў, ці вераць яны яму.

«Раман, я вам шчыра спачуваю. Вам шчыра спачуваюць многія вашы калегі ў Беларусі. Я магу ўявіць, што з вамі маглі зрабіць. І ніводнаму вашаму слову я не веру. Проста трымайцеся, проста перажывіце гэта», — сказала Пратасевічу журналістка БелаПАН Таццяна Каравянкова.

Раман Пратасевіч абвінавачваецца па трох артыкулах Крымінальнага кодэкса:

арт. 342 «Арганізацыя і падрыхтоўка дзеяньняў, што груба парушаюць грамадзкі парадак, альбо актыўны ўдзел у іх»;

арт. 293 «Масавыя беспарадкі»;

арт. 130 «Распальванне расавай, нацыянальнай, рэлігійнай альбо іншай сацыяльнай варожасці або варажнечы».

Соф’я Сапега была затрыманая па падазрэнні ў здзяйсненні злачынства прадугледжанага 342 артыкулам КК (удзел у масавых беспарадках),  таксама  яна была прыцягнутая ў якасці абвінавачванай па іншай крымінальнай справе, якая расследуецца па частцы 3 арт. 130 КК (распальванне сацыяльнай варожасці і варажнечы).