На пляцоўцы ля Опернага скралі з дзясятак дронаў. Рэдактар Tut.by: «Гэта былі праваахоўныя органы, спадзяемся вярнуць тэхніку»
26 сакавіка 2018
Падчас святкавання стогоддзя БНР каля Опернага тэатра 25 сакавіка ў невядомым кірунку знікла каля 10 аператарскіх дронаў — гэта такія прылады, якія падымаюцца ў паветра і здымаюць зверху. Імі кіруюць па радыёсувязі з зямлі.
«Як толькі над пляцоўкай стала пяць дронаў, іх адразу пачалі «уводзіць», — расказаў «Нашай Ніве» адзін з арганізатараў свята Антон Матолька. — Кралі не толькі тыя дроны, што належаць СМІ, але і тэхніку звычайных людзей. Кіраўнікі сілавых органаў, якія арганізоўвалі бяспеку, рабілі выгляд, што не ў курсе, хто гэта робіць. Наколькі я ведаю, нават у тэлеканала СТБ скралі, але ім удалося пасадзіць дрон самастойна за Операй. Я спадзяюся, што дроны вернуць».
Прадстаўнік «Белсата» ў Беларусі Аляксей Мінчонак расказаў, як выглядаў крадзеж.
«Міліцыя ведала пра тое, што мы будзем запускацца — яны перапісвалі нумары тэхнікі. Але як толькі дрон падняўся дрон, мы адраху згубілі над ім кантроль — паспелі перадаць толькі адзін кадр. Дрон быў арэндны, цацка гэта не танная — цана можа быць да дзвюх тысяч еўра. А хто мог скрасці? Той, у каго ёсць такія магчымасці — ясна, што гэта не «проста хуліганы». Людзі, якія паспелі перадаць больш кадраў, кажуць, што на даху Оперы стаяла нейкае неяснае абсталяванне, якога звычайна там няма, калі паглядзець фота ранейшых дзён», — сказаў Мінчонак.
Цяпер уласнік дрона, з якім працаваў «Белсат», звярнуўся з заявай у міліцыю.
Дрона пазбавіўся і партал TUT.BY
«Мы адапрацавалі хвіліны тры-чатыры. Трошкі відэа зрабілі, а потым згубілі кантроль. Ён уляцеў і знайсці мы яго пакуль не можам. Гэта быў асабісты дрон аператара, таму мы спадзяемся, што зможам яго вярнуць», — сказаў нам галоўны рэдактар Tut.by Марына Золатава.
Яна ўпэўненая, што ведае, дзе шукаць тэхніку.
«Гэта былі праваахоўныя органы, якія тут яшчэ могуць быць варыянты?», — падсумавала Золатава.
Таямнічая прылада на даху. Як у Дзень Волі над Опэрным выкрадалі дроны
@bajmedia
