На сайт «Беларускага Радыё Рацыя» была DDoS-атака

На працягу ўсяго дня падчас спробы зайсці на інфармацыйны рэсурс «Беларускага Радыё Рацыя» (racyja.com) у браўзеры з’яўлялася паведамленне «error 521». Гэтая памылка ўзнікае, калі вэб-сервер раптоўна губляе сувязь з сэрвісам CloudFlare. Шматлікія інтэрнэт-рэсурсы выкарыстоўваюць гэты сэрвіс для дадатковай абароны ад DDoS-атак і паскарэння ладавання кантэнту сваіх сайтаў. Cloud­Flare забяспечвае гэта праз перанакіраванне трафіку на сайт з дапамогай воблачнага проксі-сервера.

DDos-атака (dis­trib­uted denial-of-ser­vice) здзяйсняецца звычайна з дапамогай бот-сеціва, якое няспынна генеруе вялікую колькасць пакетаў альбо запытаў на мэтавую сістэму, якая ў выніку перагружаецца.

Прычынай таго, што вэб-сервер згубіў сувязь з Cloud­Flare, могуць быць два фактары:

- сервер не адказвае альбо недаступны — у гэтым выпадку трэба праверыць працаздольнасць сэрвера;

- вэб-сервер блакуе запыты Cloud­Flare. Часам сістэма бяспекі хостынгу ўспрымае пастаянныя падлучэнні з адных і тых жа IP-адрасоў за DDoS-атаку. У выніку Cloud­Flare абмяжоўвае ці наўпрост блакуе хуткасць на гэтыя адрасы.

Па стане на вечар 24 чэрвеня доступ да сайта «Беларускага Радыё Рацыя» не адноўлены. Сэрвіс Cloud­Flare прапануе доступ толькі да снэпшота (рэзервовая копія) сайта, які знаходзіцца ў рэжыме афлайн.

Карэспандэнту службы маніторынгу ГА «БАЖ» супрацоўнікі радыё паведамілі, што служба тэхнічнай падтрымкі працуе над вырашэннем праблемы блакавання сайта і абяцае вярнуць да яго доступ найбліжэйшым часам.