«Наша Ніва» абавязаная заплаціць 8700 рублёў штрафу

Сёння «Наша Ніва» абскарджвала рашэнне суддзі Эканамічнага суда Эрнэста Койры.

Ён палічыў, што старыя прынтар і ноўтбук, якія выкарыстоўваліся пры падрыхтоўцы газеты, з’яўляюцца прадметамі адміністратыўнага правапарушэння, а іх агульны кошт перавышае 1160 рублёў (40 базавых велічыняў).

Гэта мінімальная сума, патрэбная для таго, каб пакараць за «незаконную прадпрымальніцкую дзейнасць».

Атэставаны спецыяліст склаў заключэнне з ацэнкай тэхнікі. Аказалася, што насамрэч 21-гадовы прынтар каштуе 173 рублі, а 8‑гадовы ноўтбук — 229 рублёў. А значыцца, прыцягваць да адказнасці няма за што.

Аднак суддзя Алена Кастрама вырашыла іначай, пакінуўшы папярэдняе рашэнне без зменаў.