Недзяржаўныя віцебскія медыя перамаглі ў народным галасаванні

Узяць удзел у галасаванні мог кожны ахвотны, а пераможцаў вызначалі ў некалькіх намінацыях. Сайт “Народныя Навіны Віцебска” быў прызнаны адным з лідараў у намінацыі “Унёсак у развіццё супольнасці”.

— Гэта такі “мастадонт” у інфармацыйнай прасторы Віцебска. Менавіта тут мы ўжо колькі гадоў сочым за падзеямі і здарэннямі, шукаем афішу, чытаем цікавыя артыкулы, бачым аўтарскія фотаздымкі. Але час не стаіць на месцы, і пераможцам у той самай намінацыі таксама стаў зусім малады рэсурс — тэлеграм-канал Vitebsk4people,  дзе неабыякавыя людзі абмяркоўваюць важныя гарадскія падзеі і праблемы, у тым ліку інфраструктуру, экалогію, архітэктуру, гісторыка-культурную спадчыну, — распавяла каардынатарка праектаў Vitebsk4me Вікторыя Фаміна.

У намінацыі “Медыяпраект” перамогу атрымаў сайт “Витебский курьер news”, які  распачаў працу ўсяго некалькі месяцаў таму дзякуючы энтузіязму рэдакцыйнага калектыву.

— Для мяне вельмі нечакана. Я нават не думала, што грамадская супольнасць так нас адзначыць. Вельмі прыемна і пачэсна, і за павагу дзякуй! Наш поспех быў бы немагчымы без тых людзей, якія побач, — без нашых чытачоў і ўсіх, хто дапамагаў: хто справай, а хто добрым словам, — каментуе перамогу рэдактарка “Витебского курьера news” Вольга Радзюк.

У мінулыя два гады пераможцаў у сферы грамадскага актывізму ўганароўвалі падчас адмысловай імпрэзы пад назвай “Грамадскі фуршэт” ва ўрачыстай абстаноўцы ў адной з кавярняў Віцебска. Сёлета эпідэмія каранавіруса не дазваляе павіншаваць іх належным чынам, але арганізатары абяцаюць усім пераможцам даслаць памятныя дыпломы і абавязкова правесці сустрэчу ў нефармальнай абстаноўцы, як толькі гэта стане магчымым.