Новыя кіраўнікі прэс-службаў МУС і ГУУС Мінгарвыканкама не хочуць сустракацца з БАЖам

У пачатку траўня ГА “БАЖ” звярнулася ў МУС і ГУУС Мінгарвыканкама з прапановай арганізаваць сустрэчу.

На сустрэчы прапаноўвалася, у прыватнасці, абмеркаваць пытанні ідэнтыфікацыі журналістаў, магчымасці працы журналістаў-фрылансераў, стандарты паводзінаў супрацоўнікаў міліцыі з прадстаўнікамі СМІ і іншае.

— Мы хацелі б абмеркаваць гэтыя важныя пытанні з людзьмі, якія ад нядаўняга часу выконваюць абавязкі кіраўнікоў інфармацыйных службаў МУС і ГУУС Мінгарвыканкама. Да нядаўняга часу пасаду прэс-сакратара сталічнай міліцыі займаў Аляксандр Ластоўскі, які часта дапамагаў журналістам зняць многія і многія пытанні.

Мы б хацелі, каб такі ўзровень супрацоўніцтва паміж міліцыяй і журналістамі захаваўся ў будучыні. Таму бліжэйшым часам мы маем намер запісацца на прыём да намесніка начальніка ГУУС Мінгарвыканкама і намесніка міністра ўнутраных спраў, каб паспрабаваць аднавіць супрацоўніцтва. Хоць пакуль мы атрымалі адмоўныя адказы, — гаворыць намеснік старшыні БАЖ Алег Агееў.

У студзені-лютым бягучага года ва Ўпраўленні інфармацыі і грамадскіх сувязяў МУС і Аддзеле інфармацыі і грамадскіх сувязяў ГУУС Мінгарвыканкама адбыліся кадравыя змены.

На дадзены момант часовымі выконваючымі абавязкі кіраўнікоў гэтых структур з’яўляюцца Віктар Новікаў і Наталля Ганусевіч.