«Вусы Скарыны» прызнаныя праектам года па версіі канала «YouTube Беларусi»

Telegram-канал «YouTube Беларусi» абвесціў вынікі галасаванкі «Праект года 2024». З 10 намінантаў праект гісторыка Цімоха Акудовіча набраў найбольшую колькасць галасоў па выніках апытанкі.

Выява: тэлеграм-канал YouTube Беларусi

У конкурсе ўдзельнічалі праекты, якія размяшчаюцца на шматфарматных ці шматтэматэчных YouTube-каналах. У апытанцы прынялі ўдзел 551 чалавек.

Першае месца заняла праграма «Вусы Скарыны», якая выходзіць на БЕЛСАТ HISTORY, у якім гісторык Цімох Акудовіч паглыбляе нас у беларускую гісторыю разам з вельмі дапытлівымі коцікамі. Ён набраў 29%, ці 160 галасоў.

На другім месцы апынулася праграма «Шрайбман ответит», якая выходзіла на YouTube-канале «Зеркало»: за яго прагаласавалі 18%, ці 102 чалавекі. Палітычны аглядальнік Арцём Шрайбман адказваў на пытанні гледачоў пра беларускую і сусветную палітыку. Дарэчы, у апошнім выпуску ён аб’явіў, што заканчвае свой праект.

І на трэцім месцы аказалася яшчэ адна гістарычная перадача «Трызуб і Пагоня» Кацярыны Ваданосавай: за яе прагаласавалі 15%, ці 86 галасоў. Праект выходзіць на YouTube-канале «Будзьма Беларусамі!»