Прапагандысты пахваліліся статыстыкай праглядаў на Videobel.by

«Усё прайшло па плане», — расказала гендырэктарка БелТА Ірына Акуловіч пра першы дзень працы дзяржаўнага відэахосцінга Videobel.by.

Ірына Акуловіч на прэс-канферэнцыі, прысвечанай запуску Videobel.by

За першыя суткі колькасць праглядаў на Videobel.by — беларускім «аналаге YouTube» перавысіла 160 тысяч, паводле Ірыны Акуловіч, паведамляе БелТА.

«Гэта да раніцы, амаль за суткі. У геаграфіі — 90 краін. Зразумелая справа, Беларусь, далей Расія, трэцяе месца — Польшча, чацвёртае — Германія, потым Літва, шостая — Украіна, сёмае — ЗША, Грузія, Латвія».

Па яе словах, партал атрымаў «7 старонак са зваротнай сувяззю».

«У асноўным ад нашых калег і блогераў з пытаннямі, калі мы ўжо зможам таксама сюды патрапіць? Было некалькі сур’ёзных размоваў з расейскімі калегамі, якія ў тым ліку пыталіся: а нас калі возьмеце?»

Гендырэктарка БелТА адзначыла, што, нягледзячы на запыты, ў бліжэйшы час платформа будзе працаваць з кантэнтам беларускіх рэспубліканскіх СМІ.

Навошта ў Беларусі запускаюць свой клон YouTube і колькі гэта будзе каштаваць: «Кіберпартызаны» раскрылі ўнутраныя дакументы праекта

Дзяржаўны відэахостынг Videobel.by запусціўся ў Беларусі 12 верасня 2024 года. На партале будуць весці прамыя трансляцыі і анлайн-вяшчанне беларускіх дзяржаўных тэлеканалаў.

Цяпер там даступныя відэазапісы агенцтва БелТА, каналаў «Беларусь 1», АНТ, СТВ, РТР-Беларусь, СБ ТБ і канал «Мір», заснаваны дзяржавамі — членамі СНД. На сэрвісе публікуюць падборку з пяці «самых важных» навін дня. Амаль палова ролікаў прысвечаны дзейнасці Лукашэнка.

Дадаваць уласныя відэазапісы звычайным карыстальнікам нельга, рэакцый і каментароў на платформе няма. Дадзеныя па колькасці праглядаў відэа зараз таксама недаступныя.

Як у Расіі запавольваюць YouTube і ці можа гэта адбыцца ў Беларусі