Распаўсюдніцу “Витебского вестника” аштрафавалі паводле арт. 22.9 КаАП
11 лютага 2021
Справу Таццяны Юхо, якую міліцынты затрымлівалі за распаўсюд незарэгістраванага дайджэста “Витебский вестник”, 10 лютага разгледзеў суд Чыгуначнага раёна Віцебска. У выніку суддзя Алена Цыганкова прызнала жанчыну вінаватай у парушэнні заканадаўства аб СМІ і прызначыла штраф памерам 30 базавых велічынь (870 рублёў).
Паводле спадарыні Таццяны, падчас затрымання міліцыянты патлумачылі, што ім паступіў сігнал пра распаўсюд матэрыялаў з негатыўнай інфармацыяй пра супрацоўнікаў міліцыі і АМАП.
— Нічога падобнага не было. Я не адмаўляю, што раскладала па паштовых скрынях нумары “Витебского вестника”, але матэрыялы, якія там публікуюцца, не ўтрымліваюць ніякай экстрэмісцкай альбо паклёпніцкай інфармацыі, — кажа Таццяна Юхо.
Пасля затрымання 6 лютага міліцыянты правялі ў яе дома ператрус: забралі 500 асобнікаў дайджэста, камп’ютар, мабільны тэлефон, шэсць гіпсавых выяў герба Віцебска, а таксама чырвоныя і белыя паветраныя шарыкі, якія знайшлі ў шафе. Маёмасць была забраная як заклад да выплаты штрафу, але Таццяна Юхо мае намер аспрэчыць рашэнне суддзі.
Падтрымаць распаўсюдніцу дайджэста ў судзе прыйшлі чытачы гэтага выдання, у тым ліку некалькі пенсіянераў. Бо “Витебский вестник” адрасаваны найперш той узроставай катэгорыі грамадзян, якія прызвычаіліся атрымліваць інфармацыю з друкаваных носьбітаў.
“Витебский вестник” — незарэгістраванае ў Мінінфармацыі друкаванае выданне, якое збірае грамадска важныя навіны з незалежных СМІ і інтэрнэт-рэсурсаў.
@bajmedia
