Рэдакцыя «Брестского курьера» звярнулася за падтрымкай да чытачоў, каб захаваць выпуск выдання

Як паведаміў службе маніторынгу ГА «Беларуская асацыяцыя журналістаў» Мікалай Аляксандраў, упершыню за 27 гадоў існавання газеты быў зроблены такі двухтыднёвы тайм-аут.

«За гэты час было шмат тэлефанаванняў у рэдакцыю ад нашых чытачоў, якія турбаваліся за лёс выдання і цікавіліся, чаму газета не выйшла, — кажа галоўны рэдактар «БК». — Даводзілася тлумачыць, што нашыя праблемы адлюстроўваюць цяжкасці ва ўсёй эканоміцы Беларусі. Адбыўся рэзкі спад паступленняў ад рэкламы, знізіліся і пакупніцкія магчымасці людзей. Адпаведна зменшыўся наклад газеты і нашыя даходы ад выдавецкай дзейнасці».

У выніку, паводле словаў Мікалая Аляксандрава, з’явіліся запазычанасці, якія рэдакцыя не здолела своечасова ліквідаваць, што і прывяло да прыпынення выпуску «БК». Пакуль газета не друкавалася, рэдакцыя пагасіла большую частку запазычанасцяў і выхад быў адноўлены, аднак казаць, што фінансавыя праблемы «Брестский курьер» пераадолеў, не выпадае.

«Шчыра прызнаюся, я доўга супраціўляўся парадам некаторых нашых чытачоў і сяброў «БК», якія ведалі пра фінансавую сітуацыю ў газеце, каб мы звярнуліся да шырокай аўдыторыі з просьбай падтрымаць рублём. Але зараз ужо сітуацыя такая, што без гэтага нам не абысціся», — прызнаецца рэдактар выдання.

Таму ў свежым нумары газеты для тых, хто жадае і можа аказаць фінансавую дапамогу, рэдакцыя змясціла банкаўскія рэквізіты з пазнакай пра добраахвотнае ахвяраванне на падтрымку «Брестского курьера».

Р/с BY19 BLBB30120200010763001001 в дирекции ОАО «Белинвестбанк» по Брестской области. Адрес банка: 224030, г.Брест, ул. Советская, 50, БИК BLBBBY2X, УНП 200010763.