Сліжэўскі мяркуе, што ў інцыдэнце з карэспандэнтам tut.by міліцыя дзейнічала ў межах сваіх паўнамоцтваў

Паводле слоў Сліжэўскага, ён «не мае ўсёй паўнаты звестак аб тым, што адбылося». «Адзінае, тое, што я сам чытаў у сродках масавай інфармацыі, наколькі я зразумеў, дзеянні (амапаўцаў. — БелаПАН.) былі ў пэўнай ступені справакаваныя, і супрацоўнікі ўжывалі меры ў рамках сваіх паўнамоцтваў. Але ацэньваць тое, што адбылося, проста так, зыходзячы з інфармацыі, якая паступае са СМІ, я, безумоўна, не магу. Паколькі ацэнка ў гэтай сітуацыі павінна давацца кампетэнтнымі органамі», — сказаў кіраўнік Мінюста.

Журналіст Дабравольскі і грамадскія актывісты Максім Шыцік і Павел Сяргей былі збітыя падчас судовых слуханняў па рэзананснай «справе графіцістаў». Сяргей і Шыцік былі з ужываннем грубай сілы выведзеныя з залы суда за тое, што разгарнулі транспарант з надпісам «Не палітычным пераследам» і скандавалі «Мастацтва не злачынства!». Тое, што адбываецца, здымаў на тэлефон Павел Дабравольскі. Усіх трох супрацоўнікі АМАП заштурхалі ў пакой, дзе збівалі на працягу прыкладна 20 хвілін. У той жа дзень збітых асудзілі за непавагу да суда, дробнае хуліганства, непадпарадкаванне патрабаванням міліцыі і пакаралі буйнымі штрафамі.

Дабравольскі і Шыцік напісалі заяву ў міліцыю на дзеянні супрацоўнікаў і знялі пабоі ў Дзяржаўным камітэце судовых экспертыз.

Збіванне журналіста атрымала шырокі розгалас у СМІ, і 26 студзеня аддзел інфармацыі і грамадскіх сувязяў ГУУС апублікаваў каментар, у якім заявіў, што Дабравольскі «перашкаджаў законным дзеянням супрацоўнікаў міліцыі» і не рэагаваў на іх заўвагі. Паведамлялася таксама, што Следчы камітэт праводзіць праверку па скарзе Дабравольскага на дзеянні міліцыянераў.

Збіванне журналіста асудзіла прадстаўнік АБСЕ па пытаннях свабоды СМІ Дуня Міятавіч і міжнародная арганізацыя «Рэпарцёры без межаў».