Спіс «экстрэмісцкіх матэрыялаў»: папаўненне красавіка

Міністэрства інфармацыі Беларусі папоўніла Рэспубліканскі спіс экстрэмісцкіх матэрыялаў інтэрнэт-рэсурсамі, якія былі прызнаныя судамі экстрэмісцкай інфармацыйнай прадукцыяй у перыяд з 11 па 19 красавіка 2024 года.

Фота: Pix­abay для pexels.com

Паводле рашэння суда Цэнтральнага раёна Мінска ад 11 красавіка ў пералік «экстрэмісцкіх матэрыялаў» уключаны сайт «Автопортал Беларуси – ADT.BY» з ідэнтыфікатарам adt.by. А таксама старонкі ў сацыяльных сетках, афіляваныя з гэтым медыя: акаўнт «Авторулевой» у сацсетцы «ВКонтакте» (ідэнтыфікатар vk.com/adtby) і акаўнт «Авторулевой» (Auto­por­tal Adt) у Face­book.

12 красавіка суд Барысаўскага раёна Мінскай вобласці прызнаў экстрэмісцкай інфармацыйнай прадукцыяй старонку з мясцовымі навінамі пад назвай Borisov Town (ідэнтыфікатар @borisov_town) у сацыяльнай сетцы Insta­gram.

Суд Лідскага раёна Гродзенскай вобласці 16 красавіка пастанавіў лічыць «экстрэмісцкай інфармацыйнай прадукцыяй» Insta­gram-акаўнт пад назвай usual_morning з ідэнтыфікатарам instagram.com/usual_morningg. А таксама лагатып старонкі, апісаны як «надпіс “ОУ!” жоўтага колеру на ружовым фоне». Гэта старонка шоў «Обычное утро», якое вядуць Канстанцін Каверын і Людміла Міласлаўская. Сёлета 23 лютага ў «экстрэмісцкі спіс» быў унесены  Tik-Tok-акаўнт гэтага праекта (@usual_morning), а 21 лютага летась — Telegram-канал «Обычное утро» (t.me/usual_morning ) і Youtube-канал  «Обычное утро» (youtube.com/@utro) з лагатыпам, апісанне якога ў спісе экстрэмісцкіх матэрыялаў пададзена не было.

Рашэннем таго ж суда Лідскага раёна ад 17 красавіка «экстрэмісцкім» прызнаны акаўнт у Tik-Tok з назвай «lukavyen­ovosti» (ідэнтыфікатар tiktok.com/@lukavyenovosti). Гэта старонка факт-чэк шоў на Bel­satTV з аднайменнай назвай — «Лукавые новости».   

18 красавіка суд Баранавіцкага раёна і г. Баранавічы прызнаў «экстрэмісцкай інфармацыйнай прадукцыяй» кантэнт  Telegram-канала «Бальзам» з ідэнтыфікатарам t.me/balzam1906, дзе размяшчаюцца спасылкі на матэрыялы «Нашай Нівы».