Студэнтаў журфака БДУ выкарысталі для масоўкі ў Цэнтрвыбаркаме

Больш за 180 студэнтаў журфака БДУ на чале з дэканам Аляксеем Бяляевым 25–27 студзеня «працавалі медыяваланцёрамі» ў інфармацыйным цэнтры ЦВК. Як паведаміў сам Бяляеў, журфакаўцы маглі азнаёміцца «з працэсамі арганізацыі асвятлення электаральнай кампаніі ў беларускіх і замежных СМІ, убачыць працу міжнародных назіральнікаў, прыняць удзел у прэс-канферэнцыях ЦВК».

Як студэнты журфака БДУ стваралі масоўку ў ЦВК

«Гэта ўнікальны вопыт, якім могуць скарыстацца студэнты журфака», — лічыць дэкан.

Сам Бяляеў знаходзіўся ў Інфармацыйным цэнтры ў якасці «эксперта». Ён раздаў каментары дзяржаўным СМІ і расказаў Цэнтральнаму тэлебачанню Кітая «пра асаблівасці цяперашняй электаральнай кампаніі».

На пярэднім плане — дэкан журфака Бяляеў. Аднак за ягонай спіной відаць напаўпустую залу, дзе ЦВК праводзіў прэс-канферэнцыі

На Захадзе апошнюю «прэзідэнцкую кампанію» яшчэ да асноўнага дня галасавання не прызналі ні свабоднай, ні дэмакратычнай. Затое ЦВК аб’явіў «пераможцам» Аляксандру Лукашэнку з рэкорднымі 86,82% галасоў.

Як улады рэкрутуюць прапагандыстаў

Пасля падзеяў 2020 года большасць беларускіх незалежных медыяў рэлакаваліся за мяжу з‑за палітычнага пераследу. Незалежныя журналісты трапілі пад татальную зачыстку: цяпер за кратамі знаходзяцца 42 супрацоўнікі медыяў. Беларусь лідзіруе па колькасці зняволеных журналістаў у Еўропе, і нават у свеце, калі лічыць колькасць зняволеных журналістаў на колькасць жыхароў краіны.

Беларускі рэжым відавочна сутыкнуўся к кадравым голадам. Па гэтай прычыне ўлады пачалі рэкрутаваць кадры для дзяржаўнай прапаганды са школьнай парты. У канцы мінулага года Міністэрства адукацыі зацвердзіла факультатыў «Уводзіны ў прафесію журналіста» для 8—9 класаў. Літаральна праз месяц з’явіўся яшчэ адзін факультатыў «Я і мая краіна ў глабальнай камп’ютарнай сетцы Інтэрнэт» для 8–9 класаў.

Ірына Сідорская, якая працавала загадчыцай кафедры тэхналогій камунікацый і сувязей з грамадскасцю журфака БДУ да 2021 года, мяркуе, што новаўвядзенні беларускіх уладаў прадыктаваныя нежаданнем выпускнікоў «паступаць на журфак, а таксама існуе кадравы голад у рэдакцыях».

Увогуле журналістаў рыхтуюць тры ВНУ: Беларускі дзяржаўны ўніверсітэт, Гродзенскі дзяржаўны ўніверсітэт імя Янкі Купалы і ГДУ імя Францыска Скарыны ў Гомелі.

Летась у БДУ конкурс на спецыяльнасць «Журналістыка» склаў 1,07 чалавека на месца (79 заявак на 74 месцы + 6 «мэтавікаў» па-за конкурсам), на спецыяльнасць «Інфармацыя і камунікацыя» конкурс яшчэ ніжэйшы — 1,05 чалавекі на месца (44 заяўкі на 42 месцы).

Платнае аддзяленне на факультэце журналістыкі ліквідавана, бо платнікаў немагчыма прымусіць працаваць у дзяржаўных СМІ.

Нядаўна БАЖ задаваўся пытаннем, ці ўвогуле варта ісці на журфак БДУ (галоўнага ВНУ Беларусі) з перспектывай стаць прапагандыстам, і якія альтэрнатывы існуюць увогуле.