Суд абавязаў “Сильные Новости” выбачыцца перад мясакамбінатам і аплаціць выдаткі

Cайт “Сильные новости”  абавязалі абвергнуць непраўдзівыя звесткі і выбачыцца перад Гомельскім мясакамбінатам

Звесткі, змешчаныя  на сайце наконт таго, што ў прадукцыі мясакамбінату ўтрымліваюцца пабочныя прадметы, прызнаны не адпавядаючымі рэчаіснасці — яны ганьбяць дзелавую рэпутацыю прадпрыемства.  Эканамічны суд абавязаў Цэнтр  рэгіянальнага развіцця надрукаваць на сайце абвяржэнне, выбачыцца за непраўдзівую інфармацыю і сплаціць мясакамбінату судовыя выдаткі ў памеры 420 рублёў.

Разгляд пазову мясакамбінату “Сильных новостей” пачаўся 6 кастрычніка. Прычынай разбіральніства стала публікацыя “Фотофакт: “Поесть и животинку погладить”: на Гомельском мясокомбинате изготовили колбасу со шкурой и шерстью внутри”.

Фотаздымак у суполцы “СН” у сацыяльнай сетцы “ВКонтакте” выклаў адзін з чытачоў яшчэў ліпені, на здымку — кавалак а каўбасы, у якім бачныя скура і поўсць. Здымак чытач падпісаў: «Вот какую колбаску я купил… Кусок шкуры с шерсткой внутри… Больше гомельскую никогда не покупаю и вам не советую».

Навіну паглядзелі звыш 20 тысяч наведнікаў сайту. Прадстаўнік мясакамбінату патэлефанаваў у рэдакцыю і заявіў, што згаданы гатунак каўбасы не вырабляецца з 2015 году. Чытач таксама пацвердзіў, што здымак зроблены ў папярэднім годзе. Гэту акалічнасць дадалі ў паведамленне пра каўбасу. Аднак дырэкцыю мясакамбінату гэта не здаволіла — у суд паступіў зыск аб абароне дзелавой рэпутацыі.

Дырэктар цэнтру  Пётр Кузняцоў заяўляе, што ніякіх згадак наконт таго, у чым менавіта выявілася шкода прадпрыемству, у  пазове няма, хоць племум Вярхоўнага суда, аналізуючы падобную судовую практыку, указвае, што такое абгрунтаванне мусіць быць.

Тым часам юрысконсульт мясакамбінату даводзіў у судзе, што адказчык не прывёў пераканаўчых фактаў наконт таго, што каўбаса з пабочнымі рэчывамі была выраблена менавіта на Гомельскім мясакамбінаце. Аўтар фотаздымка  не прад’яўляў прэтэнзіяў ні камбінату, ні рознічнаму гандлю. Да таго ж на каўбасе адсутнічала этыкетка вытворцы.

Пазіцыя адказчыка заключалася ў тым, што сайт “Сильные новости” не з’яўляецца  непасрэднай крыніцай інфармацыі і ацэнкі якасці прадукцыі Гомельскага мясакамбінату — гэта зрабіў шараговы спажывец, чытач сайту. Ацэначнае меркаванне чытача наагул не можа разглядацца як ганьбаванне дзелавой рэпутацыі прадпрыемства.

Пасля атрымання матывіровачнай часткі пастановы “Цэнтр рэгіянальнага разьвіцця ГДФ” разгледзіць магчымасці  абскардзіць высновы эканамічнага суда.

Юрась Карманаў пра суд з «Мілкавітай»: «Справа не ў малацэ, а ў свабодзе слова»