Суд над брэсцкім фрылансерам Яўгенам Скрабцом адкладзены з‑за неахайна складзенага пратакола

Паводле пратакола, брэсцкі фрылансер вінаваты ў парушэнні артыкула 22.9 КаАП («Парушэнне заканадаўства аб сродках масавай інфармацыі»), бо “злоўжываў правам і абавязкамі журналіста, вырабіў прадукцыю сродку масавай інфармацыі ў выглядзе інфармацыйнага тэкставага паведамлення на сайце “Радыё Рацыя”.

4 лютага ўжо на пачатку разгляду справы суддзя Маскоўскага раёна Брэста Раіса Лабачэўская паведаміла, што пратакол складзены няправільна і яго трэба адпраўляць на дапрацоўку. У выніку судовае пасяджэнне перанесенае на нявызначаны тэрмін.

У мінулым годзе Яўгена Скрабца тройчы судзілі за працу на замежны СМІ без акрэдытацыі і агулам пакаралі паводле артыкула 22.9 КаАП на 65 базавых велічынь (1592,5 рублі).