Суд у Брэсце не задаволіў хадайніцтва журналіста Яўгена Скрабца
20 снежня 2019
Сябра ГА “Беларуская асацыяцыя журналістаў” Яўген Скрабец спрабаваў абскардзіць пастанову суда Маскоўскага раёна горада Брэста, паводле якога фрылансера пакаралі штрафам памерам 40 базавых велічынь (1020 рублёў). Такое рашэнне прыняў суддзя Раман Карабан на падставе часткі 2 артыкула 22.9 КаАП за тое, што Яўген Скрабец “фактычна выконваў працу журналіста замежнага сродка масавай інфармацыі, ня маючы акрэдытацыю”.
Пра тое, што ён аштрафаваны, брэсцкі фрылансер даведаўся праз чатыры месяцы пасля суда, калі атырмаў паведамленне ад судовага выканаўцы пра нясплочаны штраф. Яўген Скрабец сцвярджае, што нічога ня ведаў ні пра складзены ў адносінах яго адміністрацыйны пратакол, ні пра пастанову суда, прынятую яшчэ 7 чэрвеня гэтага года.
У сваім хадайніцтве Яўген Скрабец адзначыў, што ня быў належным чынам праінфармаваны пра разгляд справы (ніякай позвы не атрымліваў) і таму просіць аднавіць тэрмін для абскарджвання судовай пастановы.
Аднак 18 снежня суддзя Брэсцкага абласнога суда Ніна Герасімук не знайшла парушэнняў у дзеяннях суда першай інстанцыі і і хадайніцтва Яўгена Скрабца адхіліла.
Нагодай для складання адміністрацыйнага пратакола і далейшага судовага пакарання ў адносінах да брэсцкага фрылансера было з’яўленне на сайце “Радыё Рацыя” паведамлення пра затрыманне і суд над адным з праціўнікаў будаўніцтва акумулятарнага завода каля Брэста (гэтая падзея адбылася сёлета яшчэ 8 красавіка).
@bajmedia
З’явіўся спіс самых папулярных беларускіх ютуб-каналаў. Пра некаторыя вы дакладна не чулі
21.01.2024
Сайт «Народнай Волі» не абнаўляецца з 7 снежня
17.01.2024
«Вы прымушаеце людзей думаць, а палітыкаў — баяцца». У Сейме Літвы прайшлі ўрачыстасці ў гонар 70-годдзя Беларускай службы «Радыё Свабода»
22.05.2024
Пасля ўдзелу ў праграме «Белсата» Аляксандра Корнышава ў яго бацькоў правялі ператрус
29.04.2024
