Супраць Сяргея Скулаўца, які працаваў у Беларусі журналістам, распачалі крымінальную справу

Сяргей Скулавец жыў у Івацэвічах, дзе займаўся прадпрымальніцтвам і супрацоўнічаў з тэлеканалам «Белсат». У чэрвені 2023 года яго папярэдзілі, што чакаецца чарговая хваля вобшукай у журналістаў. Тады Сяргей разам з сям’ёй з’ехаў з Беларусі. Зараз яны жывуць у ЗША.

Сяргей Скулавец. Фота: Julia Cialpuk / Face­book

23 верасня 2024 года былы журналіст Сяргей Скулавец пакінуў допіс у Face­book, у якім паведамляе, што Следчы камітэт Беларусі распачаў супраць яго крымінальную справу.

«З ператрусам прыехалі да мамы, праглядзелі мабільнік, забралі яе, завезлі на мой хутар. Падрабязнасцяў, на жаль, не ведаю зусім, але справа дакладна звязаная з “Белсатам”», — піша Сяргей Скулавец.

43-гадовы прадпрымальнік з Івацэвічаў меў сваю гаспадарку: гадаваў бычкоў і вырошчваў гуркі. Адначасова працаваў журналістам «Белсата», а фермерская гаспадарка была сродкам заробку. Напрыканцы 2018 года Скулаўца спрабавалі прыцягнуць да адміністрацыйнай адказнасці за прафесійную дзейнасць.

Сёлета, ўжо будучы ў эміграцыі, Сяргей даў інтэрв’ю пра свой пераслед, пра жыццё ў Амерыцы, а таксама чаму не вяртаецца ў журналістыку.