У Гродне прэзентавалі школу сацыяльнага прадпрымальніцтва “Good Impact”

Падчас сустрэчы яна распавяла пра галоўныя мэты і задачы Школы, акрэсліла асаблівую сацыяльную значнасць навучальнага праекта і яго вялікую запатрабаванасць грамадствам. Апроч гэтага, яна пазнаёміла журналістаў з гродзенскімі прадпрымальнікамі, якія маюць паспяховы прыклад рэалізацыі бізнес-ідэй у сацыяльнай сферы.

Сваім досведам стварэння і прасоўвання бізнесу з сацыяльным кірункам падзяліліся: заснавальніца дзіцячай экастудыі “Ветка” Рыма Ушкевіч, кіраўніца прадпрыемства “Штучки в наши ручки” Галіна Алісава (70 % працаўнікоў кампаніі — людзі з інваліднасцю), дырэктарка кавярні Cofee Pause Сняжана Кудрыцкая (штоаўторак 10 % выручкі кавярні накіроўваюцца на дабрачыннасць).

Школа разлічаная перадусім на прадпрымальнікаў Гродзенскай, Гомельскай і Мінскай абласцей, якія збіраюцца распачаць або ўжо здзяйсняюць не больш за год сацыяльна-арыентаваную гаспадарчую дзейнасць. Свае дзверы Школа адчыніць для іх ужо ў верасні 2019 года. Аднымі з галоўных крытэраў для ўдзелу ў праграме з’яўляецца наяўнасць моцнай матывацыі для паспяховай рэалізацыі задуманых бізнес-ідэй. З ліку прэтэндэнтаў на конкурснай падставе будуць абраныя 60 удзельнікаў — па 20 з кожнага пазначанага рэгіёна. Міжнародныя і беларускія эксперты будуць бескаштоўна вучыць іх планаваць, ствараць і рэалізоўваць бізнес-праекты ў сферы сацыяльнага прадпрымальніцтва.

У курс навучання таксама ўваходзяць трэнінгі, майстар-класы, абмен досведам з паспяховымі прадстаўнікамі сацыяльнай бізнес-супольнасці. Важнай асаблівасцю навучальнай праграмы з’яўляецца магчымасць засвоіць атрыманыя веды на практыцы — усе ўдзельнікі атрымаюць неабходую інфармацыю пра магчымасці міжнароднага стажыравання на базе сацыяльных прадпрыемстваў. Апроч перадачы ведаў і неабходнай практыкі, праграмай прадугледжаная і фінансавая падтрымка старту бізнесу для тых навучэнцаў Школы, якія прадэманструюць найбольшы сацыяльны эфект сваіх бізнес-ідэй.

— Я спадзяюся, што ідэя стварэння ўласнага сацыяльнага бізнесу стане ў нашым горадзе больш папулярнай, як гэта адбылося, напрыклад, у Мінску. Спадзяюся, што ў нас з’явяцца новыя сацыяльныя прадпрыемствы і прадпрымальнікі, што здолеюць і грошы зарабляць, і дапамагаць людзям, якія маюць у гэтым патрэбу. Хачу, каб яны сталі прыкладам для тых, хто яшчэ вагаецца наконт таго, ці распачынаць сваю справу. У нашым горадзе, як і ва ўсёй краіне, хапае нявырашаных вострых сацыяльных пытанняў. Чым больш людзей, арганізацый, бізнес-структур будзе брацца за іх вырашэнне — тым лепш. Спадзяюся, што нашая Школа сацыяльнага прадпрымальніцтва паспрыяе гэтаму, — зазначыла ў каментары карэспандэнту ГА “БАЖ” Лана Руднік.

Партнёрам Школы сацыяльнага прадпрымальніцтва з’яўляецца праектная група “Coop­fo­rum Inter­na­tion­al” з Берліна. Сам праект стаў магчымым дзякуючы рэалізацыі праграмы Федэральнага міністэрства замежных спраў Нямеччыны “Развіццё супрацы з грамадзянскай супольнасцю краін Усходняга патрнёрства і Расіі”.

Навучальны праект на тэрыторыі Гродзеншчыны рэалізуе прыватная ўстанова “Цэнтр дадатковай адукацыі “Студыя карысных кампетэнцыяў”. На Гомельшчыне навучальную праграму здзяйсняе сацыяльнае прадпрыемства “Метэарыт Плюс”, а ў сталічным рэгіёне — прыватная ўстанова “Цэнтр вольнага часу дарослых і дзяцей “Экажыццё”.

Заяўку на ўдзел у Школе сацыяльнага прадпрымальніцтва можна запоўніць і даслаць праз гэтую спасылку.