У Магілёве зноў затрымлівалі журналіста Уладзіміра Лапцэвіча

Па словах Лапцэвіча, адзіночны пікет праводзіў Аляксандр Папкоў. Каля 11.00 ён выставіў стэнд з лозунгамі, прымацаваўшы да яго на флагштоках два сцягі — бел-чырвона-белы і чырвона-зялёны, у руках пікетовец трымаў транспарант з заклікам да старшыні аблвыканкама Леаніда Зайца “Я к вам”.

Літаральна праз некалькі хвілін Папкова затрымалі праваахоўнікі. Заадно затрымалі і журналіста, які здымаў пікет на камеру мабільнага тэлефона. Затрыманых даставілі ў Ленінскі РАУС Магілёва.

“У Ленінскім РАУСе ніхто не парупіўся падчас афармлення дакументаў аб затрыманні азнаёміць і растлумачыць права адміністрацыйна затрыманых,  як гэта прапісана ў Працэсуальна-выканаўчым кодэксе аб адміністрацыйных правапарушэннях. Толькі пасля маіх неаднаразовых патрабаванняў пазнаёміць з гэтымі правамі нам, абодвум затрыманым, прынеслі адпаведныя дакументы. На іх падставе я пачаў патрабаваць размовы са сваім абаронцам.

Праз нейкі час у мяне сур’ёзна падвысіўся артэрыяльны ціск, была выклікана хуткая дапамога, і нас з затрыманым пікетоўцам раздзялілі. Ён застаўся на трэцім паверсе, а мяне прывялі на першы. Там у хуткім часе я раптоўна з затрыманага пераўтварыўся ў сведку, і ў такім статусе мяне апыталі і адпусцілі. Відэа пікета, якое я зняў, прымусілі выдаліць, пагражаючы адабраць тэлефон і далучыць яго да матэрыялаў справы аб незаконным пікетаванні», — распавёў Уладзімір Лапцэвіч карэспандэнту службы маніторынгу ГА “БАЖ”.

Уладзімір Лапцэвіч — вядомы магілёўскі журналіст, які зараз супрацоўнічае з інфармацыйным парталам “Магілёўскі рэгіён”. Напярэдадні прэзідэнцкіх выбараў, 5 жніўня,быў затрыманы нібыта за непадпарадкаванне супрацоўнікам міліцыі. Суд Ленінскага раёна Магілёва пакараў журналіста 12 суткамі арышту. Увесь час знаходжання ў ІЧУ УУС Магілёўскага аблвыканкама журналіст трымаў галадоўку.