У журналісткі Ларысы Шчыраковай адбыўся вобшук, яе затрымлівалі сілавікі

18 лютага каля 17‑й гадзіны да яе ў прыватны дом чарговы раз прыйшлі трое супрацоўнікаў Гомельскага ўпраўлення па барацьбе з арганізаванай злачыннасцю і карупцыяй. З імі – двое панятых. Заявілі, што журналістка нібыта можа быць датычнай да крымінальнай справы аб арганізацыі масавых беспарадкаў у горадзе 20 верасня 2020 года (арт. 342 КК).

Міліцыянеры забралі ў журналісткі камп’ютар Dell, фотаапарат Pana­son­ic і айфон 5. Прычым не пакінулі нават копіі пратакола пра вынятак абсталявання.

«Пасля ператрусу, – распавяла Шчыракова, – мяне павезлі ва ўпраўленне на вуліцу Чырвонаармейскую, каб дапытаць там як сведку. Але сведчыць мне не было чаго: 20 верасня 2020 года я не была на маршы пратэсту супраць фальсіфікацыі выбараў і не асвятляла яго. Скарысталася на допыце заканадаўчай нормай не сведчыць супраць сябе і сваіх блізкіх. 

У мяне пыталіся таксама, ці не збіраюся я забраць сына і «звальваць» бліжэйшым часам за мяжу. Патлумачыла, што я наогул перастала займацца журналістыкай, пра што публічна паведаміла ў Face­book».

Паводле слоў суразмоўніцы, супрацоўнікі ГУБАЗіКа прапаноўвалі ёй запісаць яшчэ і відэазварот пра адмаўленне ад занятку журналістыкай, але яна не пагадзілася, бо “надта ж неякасныя здымкі ў іх атрымліваюцца”. Паабяцала самастойна запісаць такі зварот і выкласці ў Face­book на дадатак да напісанага.

«Каруселевыя» ператрусы сілавікоў у журналістаў, блогераў ды грамадскіх актывістаў, на думку Шчыраковай, наўпрост звязаны з палітычнымі кампаніямі ў краіне – гэтым разам з ужо аб’яўленым рэферэндумам па зменах у Канстытуцыі. Выглядае, што ўладам дужа не даспадобы, каб у грамадстве прысутнічалі альтэрнатыўныя погляды на арганізацыю кампаніі і галасаванне. Таму і прыдумляюцца розныя падставы, каб чыніць перашкоды, нагнаць паболей страху, а заадно і дыскрэдытаваць вядомых асобаў.            

На пачатку лютага ў тым жа Гомелі міліцыянеры прыйшлі да аднаго са старэйшых журналістаў рэгіёну з трэцім ператрусам – на той падставе, што ён, як сказана ў пастанове, «дзейнічаючы з выключным цынізмам», нібыта мог раскідаць каля будынка ДАІ вострыя металічныя шыпы тыпу «Ёж».

Ларыса Шчыракова: “Мая журналісцкая кар’ера скончылася”