«Важны дзень добрых навін». Кацярына Пытлева расказала пра свой стан пасля аперацыі

Фота: Facebook Кацярыны Пытлевай

Тэле– і радыёвядоўца Кацярына Пытлева, якой у 2022 годзе дыягнаставалі анкалогію, перанесла складаную аперацыю па выдаленню грудзі. Пасля аналізу стала вядома, што злаякасных клетак у ёй не было. Гэта дае надзею на канчатковае выздараўленне, напісала Кацярына на сваёй старонцы ў Face­book.

«Важны дзень добрых навін. У другой выдаленай грудзіне ні клетачкі раку! Мне зрабілі ўнікальную аперацыю па рэканструкцыі, і цяпер па жаночай частцы раку вяртацца няма куды. Былі праблемы на аперацыі, але цяпер усё добра, і наперадзе вясна, рэабілітацыя, новыя працы, праекты і цудоўнае новае жыццё. Хочацца верыць, што гэта ўжо кропка ў #маявайна.

Канешне, лекі я буду піць яшчэ 5–7 год, але рызыкі ўжо не такія, як былі. Дзякуй усім, хто перажываў, падтрымліваў і дасылаў прамяні дабра, яны ўсе дайшлі. Я ззяю, як птушка фенікс. Пайшла несці гэтае святло і дабро ў свет. Цудоўнага дня, Чалавекі!» — піша журналістка.

Пра сваю хваробу Кацярына Пытлева паведаміла ў ліпені 2022 года. Тады ёй дыягнаставалі другую стадыю. Пухліну змаглі выдаліць. Зараз Кацярыне зрабілі яшчэ адну аперацыю. Яна доўжылася 12 гадзін.