Вядучы праграмы “Контуры” на АНТ падпрацоўвае на расійскім тэлеканале

Паводле беларускіх законаў, працаваць на замежныя СМІ можна толькі з адпаведнай акрэдытацыяй Міністэрства замежных спраў. Тое, што гэта расійскае СМІ, не мае значэння.

“Для супрацоўніцтвам з расійскімі СМІ таксама патрэбная акрэдытацыя, як і з любымі іншымі замежнымі СМІ, — каментуюць Еўрарадыё ў прэс-службе МЗС. — Не зважаючы на саюзную дзяржаву. Нават для разавых матэрыялаў яна патрэбная”.

Больш за тое! Паводле закона, журналіст, які мае акрэдытацыю на тэрыторыі Беларусі ад замежнага медыя, не мае права працаваць журналістам на іншыя СМІ. Адпаведна, нават калі ў Іллі Коласава ёсць акрэдытацыя ад RTVI, то ён не мае права працаваць… на АНТ. Але гэта адбываецца, а значыць, вядучы “Контураў”, магчыма, парушае закон.

“Я не выключаю, што гэта нейкія архіўныя матэрыялы, — здзіўляецца пытанню Еўрарадыё дырэктар дырэкцыі інфармацыйнага вяшчання тэлеканала АНТ Руслан Паддубскі. — Калі вы ведаеце, то папярэдняе месца працы ў яго было на гэтым канале (RTVI). Ён узначальваў карпункт у Берліне. Але цяпер у яго ніякіх штатных адносінаў там няма, ён працуе ў нас. Думаю, што ў тых сюжэтах, пра якія вы кажаце, яго выкарыстоўвалі, як экспертнае меркаванне, і размова не вялася пра тое, што ён нейкі штатны аглядальнік і гэтак далей”.

Але рэч у тым, што Іллю Коласава на канале RTVI падпісваюць і прадстаўляюць менавіта, як “аглядальнік RTVI ў Мінску”. А для сюжэтаў, якія паказваюць паралельна з яго словамі, выкарыстоўваюць тыя ж кадры, што і для сюжэтаў на гэту ж тэму ў праграме “Контуры”.

Апошні выступ Коласава на расійскім канале быў пра візіт Аляксандра Лукашэнкі ў Турцыю. Дык вось каментарый міністра замежных спраў Уладзіміра Макея ў сюжэтах АНТ і RTVI відавочна здымаўся адным аператарам і ў адзін час.

“З пачатку года аштрафавалі дваіх журналістаў, але агулам дзесяць разоў, — распавядае пра пакаранні за працу без акрэдытацыі на незалежныя беларускія СМІ старшыня БАЖ Андрэй Бастунец. — Агульная сума штрафаў на сёння — каля 78 мільёнаў рублёў. А летась было 28 штрафаў на агульную суму больш за 146 мільёнаў рублёў. То бок сёлета аштрафавалі ўжо фактычна на палову сумы мінулага года”.

Ці будзе ў выніку пакараны за магчымае парушэнне заканадаўства Ілля Коласаў, невядома. Еўрарыё будзе сачыць за развіццём падзеяў.