WATCH DOCS упершыню завітае ў Гродна

Фэст ужо двойчы адбываўся ў Мінску, а цяпер ўпершыню — у Гродне.

WATCH DOCS BELARUS у Гродне — гэта шэсць дзён, падчас якіх Вы зможаце пазнаёміцца з новым кіно сусветна вядомых дакументалістаў.

Пра будучыя паказы распавядае каардынатар паказаў гэтага фэсту ў Гродне Вольга Галецка:

— Фэст будзе цягнуцца 6 дзён з 12 па 17 снежня. Штодня можна будзе паглядзець па аднаму фільму. Фільмы прысвечаныя розным тэмам — гэта і правы жанчын, і вайна ў Чачні, і вайна ва Украіне, экалогія, сталыя людзі.

Фільмы будуць паказваць у Гродне на розных пляцоўках горада — гэта грамадскае аб’яднанне «Цэнтр «Трэці Сектар», Цэнтр дадатковай адукацыі дарослых «Студыя карысных кампетэнцый», а таксама бар “Несцерка”, што знаходзіцца ў самым цэнтры горада.

Арганізатары фэсту ў Гродне спадзяюцца, што фільмы будуць цікавыя шырокаму колу гледачаў. Уваход на ўсе прагляды — вольны.