Змітра Лупача аштрафавалі за сюжэт пра каранавірус

Зміцер Лупач кажа, што рашэнне суда не было для яго нечаканым. Усё як звычайна. Толькі заставалася гадаць, які будзе штраф —  40, 45 ці 50 базавых велічынь. Суддзя агучыла 40 базавых — 1080 беларускіх рублёў.

Журналіст распавёў, што міліцыянты апыталі толькі аднаго чалавека, з тых, хто ўдзельнічаў у вулічным vox pop­uli.

— Не ведаю, ці астатнія людзі не пагадзіліся з імі размаўляць, ці міліцыянты сталі лянівымі. Я не бачу нічога супрацьзаконнага ў тым, што я прыехаў і зрабіў апытанне людзей.

На судзе прысутнічаў сведка Сяргей Гарбачоў, які выказаў сваё меркаванне пра каранавірус журналісту на камеру. Ён сказаў у судзе, што не ведаў, што чалавек, які бярэ інтэрв’ю, можа быць злачынцам. Сяргей Гарбачоў заўважыў, што ў Беларусі — свабода слова, а тут суд.

Пасля апытання суддзя Аксана Табола прапанавала Гарбачову прысесці ў зале, каб далей прысутнічаць на працэсе. Але сведка адмовіўся і сказаў: «Калі тут прысядзеш, то можа здарыцца, што і самога пасадзяць». Пасля чаго хутка пакінуў залу суда.

Зміцер Лупач збіраецца раіцца з праваабаронцамі наконт таго, ці абскарджваць пастанову Шаркаўшчынскага раённага суда. Але асаблівага сэнсу ў гэтым не бачыць, бо, як паказвае практыка, скаргі Віцебскі абласны суд не задавальняе.