«І памятай: няма зачыненых дзвярэй». Беларуская спявачка Paulinn прэзентавала калыханку
14 жніўня 2023
У 2020-м годдзе салістка і стваральніца гурта Paulinn Паліна Цімохіна з'ехала з Беларусі ў Польшчу. Тут жыццё яе кардынальна змянілася: маючы дыплом факультэта журналістыкі БДУ, дзяўчына пайшла ў больш тэхнічную сферу і вывучылася на інжынера гуку, а яшчэ выйшла замуж і нарадзіла блізнят. Менавіта чаканне дачок натхніла Паліну на запіс калыханкі. Не так даўно спявачка прэзентавала новую песню на лічбавых пляцоўках.
— Гэта мікс пачуццяў, якія складана акрэсліць у нейкім адным слове. Маё жыццё апошнім часам вельмі моцна змянілася. Я стала мамай. І мамай адразу двух дачок. І сум і радасць заключаюцца ў тым, што дзеці – гэта цуд і безумоўная радасць, але адначасова гэта вельмі складана.
Другая частка майго жыцця, без якой я не бачу сябе, — гэта музыка. І адначасова дзеці, гэта напачатку цяжка вяжацца адно з адным. І таму і сум, і радасць, і хочацца працягваць рабіць музыку, ствараць нешта новае, але тут дзеці і ты не можаш разарвацца, — распавяла Паліна Цімохіна ў эфіры «Радыё Рацыя».
Спявачка напісала «Калыханку», калі яшчэ чакала нараджэнне блізнят.
— Быў такі настрой, навокал было шмат сумных падзей, якія мы ўсе ведаем, і хацелася ў гэтай «Калыханку» перадаць менавіта такую думку аб тым, што б навокал не здаралася, што б не адбывалася, для дзяцей мы заўсёды захаваем гэты спакой — як я там спяваю — пяшчоту, мы захаваем гэта ў далонях, пакладзём у кішэню і пранясём для дзяцей і захаваем іх спакойны сон.
Чытайце яшчэ:
Што не так у беларускіх медыя з асвятленнем тэмы ЛГБТК+? Запыталіся ў экспертаў і калег
Пра што пісалі і чаму цэнзуравалі першую ў Беларусі газету: гісторыя Gazeta Grodzieńska
Медыяпраект Girls Power Belarus змяняе фармат
@bajmedia
