У Бабруйску ўзнагародзілі пераможцаў Першага творчага конкурсу ГА «БАЖ»

Конкурс цягнуўся больш за месяц. Журналістаў з усёй Беларусі заклікалі паспрабаваць свае сілы ў паэзіі, мастацкай фатаграфіі і аўтарскай песні. Пераможцаў запрасілі ў Бабруйск на ўрачыстае ўзнагароджанне, якое адбылося 27 траўня.

Першым пунктам праграмы была экскурсія для гасцей па горадзе, якую правяла старшыня бабруйскай суполкі ГА «БАЖ» Марына Маўчанава. Канкурсанты і чальцы журы пабачылі самыя цікавыя помнікі Бабруйска — касцёл Беззаганнага Зачацця Найсвяцейшай Панны Марыі, дом купчыхі Кацнальсан — былую “зялёную бібліятэку”, завіталі ў крэпасць, прагуляліся па Сацыялцы, сфатаграфаваліся са знакамітым бабром і завяршылі шпацыр каля помніка ахвярам рэпрэсій.

Узнагароджанне адбывалася ў тайм-клубе “1387”. Там жа была адкрытая фотавыстава з работ у намінацыі “Мастацкае фота”.

Лепшымі прызналі фотаздымкі Аляксандра Чугуева, фотакарэспандэнта газеты “Вечерний Бобруйск”.

Другое месца атрымала Александрына Глаголева, журналістка газеты “Бабруйскі кур’ер”, трэцяе — Аляксандр Храмко, фотажурналіст з Горак.

Вызначалі пераможцаў сябры журы: бабруйскі фатограф Уладзімір Шарнікаў, фотажурналіст з Барысава Аляксандр Зянкоў, фатограф з Мінска і ўраджэнец Бабруйска Васіль Фядосенка.

Фіналісты і журы намінацыі “Паэзія” чыталі свае вершы. Пераможцай стала Кацярына Марголь, рэдактар і журналіст часопіса On Air.

Другое месца — у Варвары Чаркоўскай з Салігорска, трэцяе — у Аляксея Белага з Баранавіч.

У журы ўвайшлі паэт, старшыня Беларускай асацыяцыі журналістаў Андрэй Бастунец, паэт, пісьменнік, галоўны рэдактар газеты “Бабруйскі кур’ер” Анатоль Санаценка, паэт і журналіст Дзмітрый Растаеў.

У намінацыі “Аўтарская песня” перамог Георгій Станкевіч з в. Старыя Ранчыцы (Бешанковіцкі раён Віцебскай вобласці).

Канкурсанты і госці фэста пачулі невялікі, але вельмі душэўны канцэрт. Барды Аляксандр Ільін, Андрэй Павук, Павел Бузько — заспявалі пад гітару свае песні.

Напрыканцы імпрэзы галоўны арганізатар фэста Андрэй Шобін паабяцаў, што гэты творчы конкурс быў першым, але будзе не апошнім. Ён спадзяецца, што конкурс стане добрай бабруйскай традыцыяй.

Фота Уладзіміра Шарнікава