Журналіста Генадзя Мажэйку два дні запар уносяць у «чорныя спісы» сілавікоў – спачатку КДБ, а потым і МУС

У «экстрэмісцкім» спісе Міністэрства ўнутраных спраў РБ, абноўленым 30 чэрвеня, Генадзь Мажэйка значыцца пад № 2980 — сам пералік упэўнена набліжаецца да трох тысяч.

«Грамадзянам, уключаным у названы пералік, да пагашэння судзімасці і на працягу 5 гадоў пасля яе пагашэння забараняецца займацца дзейнасцю, звязанай з абаротам наркатычных сродкаў, зброі, выбуховых рэчываў, выдавецкай і педагагічнай дзейнасцю, а таксама займаць дзяржаўныя пасады, праходзіць вайсковую службу. Фінансавыя аперацыі такіх грамадзян падлягаюць асабліваму кантролю з мэтай прадухілення легалізацыі даходаў, атрыманых злачынным шляхам, і фінансавання экстрэмісцкай дзейнасці», — адзначаецца на сайце ведамства.

Адметна, што літаральна напярэдадні Генадзя Мажэйку не абышла ўвагай іншая дзяржструктура – Камітэт дзяржбяспекі РБ. Цяпер ён у спісе асобаў, якія нібыта «маюць дачыненне да тэрарыстычнай дзейнасці».

Як і ў выпадку з мусаўскім пералікам, пападанне ў базу КДБ цягне для фігурантаў перадусім службовыя і фінансавыя абмежаванні. Так, накладаецца забарона на распараджэнне і карыстанне грашовымі сродкамі, правядзенне фінансавых аперацый — напрыклад, адмова ў правядзенні дзяржаўнай рэгістрацыі нерухомай маёмасці і правоў на яе, рэгістрацыі ўгодаў з каштоўнымі паперамі, ажыццяўленне натарыяльнага дзеяння, якое адносіцца да фінансавай аперацыі, і шмат што іншае.

Генадзя Мажэйку затрымалі 1 кастрычніка 2021 года ў аэрапорце Масквы і прымусова вярнулі ў Беларусь. Падставай сталі падзеі ў Мінску 28 верасня, калі ў кватэру да праграміста кампаніі EPAM Sys­tems Андрэя Зельцэра спрабавалі ўварвацца байцы спецпадраздзялення КДБ. Адбылася страляніна, падчас якой гаспадар забіў аператыўніка Дзмітрыя Федасюка, а ў адказ застрэлілі яго самога.

У нататцы пра надзвычайнае здарэнне карэспандэнт «Комсомолки» спаслаўся на аднакласніцу Андрэя Зельцэра, якая прыязна згадала пра сябра дзяцінства. За «гераізацыю тэрарыста» Міністэрства інфармацыі неадкладна заблакавала сайт выдання (kp.by), у адказ расійскія заснавальнікі заявілі пра немагчымасць дзейнасці беларускай рэдакцыі. 

Спачатку Генадзю Мажэйку інкрымінавалі «распальванне расавай, нацыянальнай, рэлігійнай або іншай сацыяльнай варожасці» паводле ч. 1 арт. 130 КК, а ўжо падчас следства з’явіўся эпізод на падставе ч. 1 арт. 368 КК — «Абраза прэзідэнта». Нібыта на сустрэчы выбарцаў з дэпутатам Палаты прадстаўнікоў Валерыем Варанецкім той «на мяжы фолу» крытыкаваў кіраўніка краіны.

Генадзь Мажэйка адпачатку называў інкрымінаваныя абвінавачанні «абсурднымі», не прызнаўшы сваёй віны ні па адным з прад’яўленых артыкулаў.

Між тым 23 сакавіка Мінскі гарадскі суд пакараў карэспандэнта «Комсомольской правды» в Беларуси» Генадзя Мажэйку 3 гадамі калоніі агульнага рэжыму. Рэзанансны працэс над супрацоўнікам беларускай рэдакцыі расійскай газеты «Комсомольская правда» в Беларуси» заняў амаль 4 месяцы.

Вярхоўны суд пакінуў апеляцыйную скаргу ў сіле, не знайшоўшы падставы прынамсі змякчыць пакаранне. Цяпер журналіст чакае этапавання для адбыцця пакарання ў папраўчую калонію.

Чытайце яшчэ:

Аператару Паўлу Падабеду прысудзілі 4 гады калоніі

«Вялікую ролю грае матывацыя кандыдата». Рэдактары недзяржаўных медыя далі парады суіскальнікам працы

Эксклюзівы і інсайды пра Гомель і вобласць: як пратэсны праект урбаністаў ператварыўся ў паспяховае рэгіянальнае выданне